صباح الورد

من فترة كبيرة ماروحتش واشتريت ورد من اجمل الاوقات عندي لما اروح واجمع الورد بنفسي واختار الوانه مع بعض بجد متعة جميلة جدا لما تجمع صحبة ورد على ذوقك والوانها على مزاجك مش مهم الالوان تكون متناسقة مع بعض فعلا

انا بحب اوي لما الاقي الوان كتيركده في صحبة الورد فعلا بحس بجمال كل لون لما بشوفوه في اي وردة او زهرة جميلة والالوان كلها متجمعه مع بعض على طبيعتها مش متزوقة ولا مترتبة بحس انها طبيعية واحلى واجمل بكتير
ودايما بقول لو عايز تحس بجمال الالون حتلاقيها في الورد

الفكرة فعلا بتزن في دماغي بقالها كتير حبيت استغل يوم الاجازة وانزل اتمشى مع وجود امل كبير اني اشترى الورد
و الكورنيش مليان مشاتل يعني مفيش حجة تانية بعد قهوة الصباح الدوبل وفى روح رياضية بحتة نزلت الصبح بدري اول حاجة رحت اجيبها كان الورد
المرة دي لفت نظري اني مهتمتش اني اجمع الوان كتير هو لون واحد بس

لاقيت اني بجمع الورد الاحمر شكله جميل اول مرة احس ان لون واحد ممكن يحسسك بكل الالوان وتاخد منه كل الاحاسيس دي

حب ,كره ,غيرة , طاقة , عنف , جمال , ضعف ,قوة ....ده فعلا اللي حسيت بيه اول ماشفت منظره مجمع مع بعض
وده مش تعصب للون الاحمر بما اني من عشاقه لكن لان اول مرة احس بيه بالشكل ده

اكتفيت بعدد قليل مش كتير ومجرد اني اجمعهم مع بعض واحس كانهم وردة حمرة كبيرة كنت فعلا سعيدة بمنظرهم

وشكلهم الجميل بعد ماحطيته في فاز صغيرة بصيت لهم من بعيد كده وقلت لنفسي
!!....ياااااه بس لو الورد مايدبلش

حاتشوفوا كلامي صح ولا غلط؟

دي كانت بالليل
:)"اكتر واحدة حبيتها"