اماني .." باللون النور ضحكتها..تلون قلب الكون سبع الوان "

من يومين جاتلي مكالمة كانت مفاجاءة بالنسبة لي
صوت بنوتة صغيرة
انا اماني ياميس ريم وحشتيني....
كانت الكلمتين دول كفايه عليا ان دموعي تنزل غصب عني واضحك ضحكة طفوليه طلعت مني ...اماني وحشتييييينني

كنت في الكلية وكان عندي فترة تدريب عملي ولأني اعلام واعلام تربوي كنا بنروح زي

مابنروح تدريب صحافة كنا بنروح مدارس وغالبا ابتدائي
ولاننا في مدارسنا الحكومية العظيمة المهام عندها اكبر من ذلك وبتعتبر ده رفاهية وحاجة مالهاش لازمة كنا بنروح مدارس تجريبية او خاصة
كنت فاكرة انها حاتكون من اسوء فترات حياتي في الكلية وده لأني اول مارحنا كنت بارجع اخد 2 بانادول وانام لتاني يوم وارجع اعيط لصحابي واقولهم انا خلاااااص
العيال حايجننوووووووووووووووني
وده لانهم اشقيا اوي بالذات الولاد
لكن اللي حصل اني قابلت حب كبير منهم على قد شقاوتهم دي اللي جننتني
وبالرغم من الريفو والبانادول وكل ادوية الصداع اللي اخدتاه

وحب البنات ليا بالذات
كانت المدرسات بيضيقوا من منظر البنات حواليا ساعة مايشوفوني

ويجروا يحضنوني وانا مش عارفة اتحرك منهم
وبعدين تطلع المشرفة ..مش معقول كده ياميس

- طبعا انا كنت بتعفرت ساعتها من كلمة "ميس" دي -

!! البنات في الكوريدور عاملين دوشة المفروض تدخليهم الكلاس
اماني بقى دي ملاك قمر صغير بنوتة زي العسل ضحكتها جنة..
كانت بتحبني اوي وانا بموت فيها
من اول مرة شفتها حسيت اني اتعلقت بيها
وكنت بستنى كل يوم الباص علشان تركبه وتروح واروح انا بعد ما اكون اطمنت عليها...
اخر يوم ليا هناك.. كانت ماسكة في الجاكيت

والشنطة بتاعتي وكأنها مش هاتخليني امشي بالطريقة دي
واستنيت الحصة الاخيرة وبسرعه جريت روحت قبل ماتاخد بالها اني مشيت
حكوا لي صحابي على اللي عملته بعد كده لدرجة ان صحابي زعلوا مني
اني زعلتها اوي كده ...وواحده منهم قالتلي "بجد ماكنتش عارفة ايه المعجزة اللي ممكن تخليها تسكت من العياط"
فضلت سنة بحالها واحشاني قلت لنفسي اكيد بيبي وبكره تنسى ...

بعد مكالمتها جريت دورت على الصور اللي صورتها ليها اخر يوم قبل
ماامشى وازي كانت مكشرة ومش عايزة تضحك
بالرغم اني قلت لها انا واخدة اجازة
لكنها كانت عارفة اني مش هارجع اجي كل يوم تلات الصبح تاني
ولاقيت الجواب اللي كتبته ليا واللي حطيت صورته
طبعا مش قادرة اقول على الكلام الجميل والبريء منها بالرغم من
غلطاتها الاملائية واللي من غيرها مش هايكون ليه نفس الجمال ده
مكالمتها ليا فجأتني.. وابكتني غيابي عنها سنة ماغيرش حبها ليا

حب "اماني " وغيرها من البنات اللي كانوا بيجيبوا ليا هدايا في الوقت اللي المفروض انا اللي اجيب فيه
الحب ده بدون مقابل حب بجد صافي وحقيقي احساس مش عارفة اوصفه
بالرغم من اني قبل الفترة دي كانوا الاطفال بالنسبة لي (عادي ) يعني ومش بهتم اني العب معاهم او اعاكسهم
لكن بعد كده حسيت بحاجة مختلفة وحركوا فيا حاجات كتير
حب الاطفال نعمة من عند ربنا يارب الكل يحس بيها
والي هيحس بيها بس هو اللي هايفهم كلامي

ول "اماني " بجد نفسي اشوفك مرة تانية والعب معاكي زي ماكنا بنلعب مع بعض
وتغني تاني واغنى معاكي ونلون الوان كتير زي ماكنتي بتحبي الالوان الي بحبها انا كمان..اضحك وتضحكي الاقي ضحكة باللون النور .. تلون قلب الكون سبع الوان
:)..