اثناء قرائتي الصباحية للأخبار في الجرايد والمواقع اللي بتابعها
وقفت عند خبر في موقع في البلد
وهو الخبر ده اختفاء المخدرات والسرقات في المعادي بسبب السفاح
لا مش بس كده جوه الخبر كمان ان حوادث السرقة للشقق اختفت
والبلطجية هربوا وحسوا على دمهم وربنا هدهم وان شالله يهديهم
كده على ايدين استاذ سفاح
الاهم من كل ده بقى هو ان المعاكسات للبنات اختفت
وده لأن الشباب خايف من التواجد الامني المكثف في الشوارع
وطبعا مش حايروح في داهية عشان يعاكس واحدة هو اساسا مش
شايف شكلها ايه بس بيعاكس وخلاص!! اه والله بيحبوا يثبتوا وجودهم وخلاص
مع اصحابهم بقى وقدام المدارس ومحطات المترو ربنا هداهم الحمدلله وكله بقى مؤدب
وعينيه في الارض من البيت للشغل ومن الشغل للبيت ايه الجمال ده
ضحكت في سري وقلت ياسلااااااام ايه ده والله الادب حلو
طيب احنا عايزين واحد سفاح في المنيل ضروري
وواحد سفاح في المهندسين وبالمرة الدقي عشان بروح هناك كتير
والزمالك وجسر السويس عشان اعرف اروح لبنت خالتي براحتي
ياسلام يعني هو السفاح بيعلم الادب مفيش معاكسات مفيش مخدرات
ومفيش سرقة والناس اتعلمت الادب
والامن بقى مكثف ويقظ وشايف شغله كويس اوي
والحياة بقيت وردي ينقصها القبض على السفاح ...طيب
شكرا لعمو السفاح علمتهم الادب والله بس انت كمان زودتها شوية وطولت فيها
وحسيت في مرة ان انت عامل زي الكونت دي مونت كريستو
كده يعني ماحدش عارفلك شكل ومش عارفين يقبضوا عليك
فا احنا بنشكرك والله على انك علمتهم الادب وكفاية بقى لحد كده
لانك مزودها شويتين وكفاية الرعب اللي انت عامله للناس ده
ولو اني خايفة من التطويل ده والناس تتعود بقى ويبقى عادي
اصل الموضوع حيتناقش في مجلس الشعب وجلسات بقى واعترضات
مش عارفة احنا لسه حناقش وحانعترض ونشجب ولا ايه
وبعدين مادام التواجد الامني مكثف ماتنجزوا وتقبضوا عليه مش كده يعني
:) زودتها ياسفاح
16 comments:
والله كتر الف خيره..الراجل خدم منطقة المعادي اكبر خدمة
وعلى رأيك عايزين واحد سفاح في كل منطقة في مصر
ربنا يسهل بقى ونخلص علشان الرعب الي حاصل ده بقى كتير
سعيدة فعلا اني رزتك ياريما يلي بتفكريني بأغنية فيروز
سلامي ليكي
ادعوا لعموا السفاح بطولة العمر الله يخليه
الله يخليه و يبارك فيه
والنبي اتنين سفاحين
سكر برة
طب زي الفل كده
احنا نجيب في كل حتة سفاح علشان الحياة تتظبط كده
وياري بقي سفاح سياسي
علشان يظبط السياسة برضو
وسلملي علي العادلي
بيقولو السفاح
ايران اللي عاملاه
هههههههههههههههههه
ايه ياريما العنف ده ليه كده عايزة مصر كلها سفاحين ولا ايه
دي اخرة الايس كريم يابنتي مش حلو في السن ده
بعتذر للكل عن التأخير في الرد
بس الحالة ترجع للموود العام مش تمام
بالمرة وانا للأسف مش بعرف افصل بين كل حاجة :(
بيسوو:
ربنا يستر يابيسو وانشالله يقبضوا عليه
ميرسي ياجميل وياريت اكون بفكرك بحاجة جميلة كده دايما زي فيروز الجميلة
ذو النون المصري:
مش طولة العمر اوي يعني :)
كفاية الواجب اللي عمله لحد كده
amr ahmed:
فعلا سفاح سياسي حايعلمهم الادب كتير
هو في سفاحين سياسيين طبعا بس على مزاجهم ومن النوع الاليف :)
شكرا لزيارتك
جبهة التهييس الشعبية:
قبل ماانسى اسم المدونة فعلا مفتكس:D
ايران تعمل سفاح في المعادي طيب يختاروا مكان تاني قريب شوية شبرا حاجة كده :)
yousri:
شفت بقى يايسري تفتكر الايس كريم
بس انا خلاص عرفت السر في اللي حصل يومها كان مين تركيزك عالي اوي على فكرة ومفعوله مستمر يعني هههههههههههه
بالنسبة للسن يافندم معلش بقى طيش شباب تقول ايه البركة فيكوا انتوا الناس البركة بتوع زمان دول بقوا منقرضين الايام دي
انتى مستعجلة على اية بكرة يقع بس الصبر هههههه
عارفة ريما ان امر السفاح دة يحير محدش عارف لية بيحاول يقتل البنات اكيد الموضوع فية سر
تحياتى
مستعجله؟؟ ياتامر ده بقاله يمكن شهرين عايش حياته براحته خالص رايح جاي يعمل اللي هو عايزه
هو السر انه معقد :)
ماله هو ومال البنات ؟؟؟عقدة تحولت لجنان رسمي
تحياتي ليك يا تامر
ممكن لو سمحتي توصيلنا عى واحد سفاح من افخر الانواع لمدينة نصر
محتاجينلة جدا فيها بجد
ولو اتنين نظرا لمساحه مدينة نصر الشاسعه يكون افضل
شفتي بقى المعادي امان ازاي
انتي اللي بتقولي اهو
:P
تعالي انتي بس ولا يهمك
سفاح ايه يابنتي ده مننا وعلينا
الحصان لاسود:
فعلا مدينة نصر محتاج سفاحين ازاي نسيتها :)
ومش حايعرفوا يلاقوهم كمان اذا كان المعادي دايخين وراه
:D
سعيدة بزيارتك
مادلين:
والله يامودي هي بقيت امان والاستاذ سفاح علمهم الادب زي ماقلت فعلا
بس حكاية اني اجيلك دي محتاجة شوية
:)وقت
بقولك ايه ماتيجي انتي وبلاش الرعب اللي انتي عايشة فيه ماهو انتي اللي مش مطميناني
Post a Comment